Ir-raba’ kappella u l-aħħar waħda min-naħa tax-xellug hija dik ta Sant’Albert. Il-prospettiva ta’ din il-kappella kienet tixbaħ ħafna l-kappella tal-Lunzjata.
Il-kwadru ta’ din il-kappella huwa kwadru ta’ valur artistiku kbir xogħol ta’ Mattia Preti. Fih jidher Sant’Albert liebes ta’ Karmelitan bil-kappa l-bajda, mixħut għarkupptejh quddiem altar, bil-kurċifiss f’idu l-leminija waqt li x-xellugija tinsab fuq sidru. Għajnejh huma mitfugħin lejn is-sema fejn donnu qed jilmaħ viżjoni, u dawl għoli jinsab mitfugħ fuqu waqt li mill-għoli jidhru żewġt irjus ta’ anġli qegħdin iħarsu lejh.
L-artal, li sar fl-1857, huwa kollu tal-irħam u għadu jista’ jitgawda fil-knisja l-ġdida. Dan l-artal kien ġie kkonsagrat fit-22 ta’ Lulju 1881 mill-Isqof Karmelitan Mons. Angelo De Martis Isqof ta’ Sardinja. Qabel dan l-artal kien hemm ieħor tal-injam.